Britaniya şahzadəsinin qalmaqallı avtobioqrafik əsəri bir gündə rekord sayda satılıb

Böyük Britaniya şahzadəsi Harrinin “Spare” (“Ehtiyat”) adlı qalmaqallı avtobioqrafik əsəri bir gündə 1,4 milyon nüsxədən çox satışla rekord vurub.

“Report” “Autoparus”a istinadən xəbər verir ki, bu barədə “Penguin Random House” məlumat yayıb.

Bildirilib ki, avtobioqrafik əsərin ilk gündə bu qədər sayda satılması indiyədək müşahidə edilməyib.

Nəşr, elektron və audio kitab şəkilində olmaqla ABŞ, Kanada və Böyük Britaniyada buraxılış günündə cəmi 1 milyon 430 min nüsxə satılıb.

500 səhifəlik əsərdə kral ailəsindəki gərginliklər, bir sıra şəxsi məsələlər öz əksinin tapıb. Harri kokain istifadə etdiyini, ilk dəfə yaşlı bir qadınla münasibət qurduğunu, qardaşı Uilyam ilə ciddi mübahisə etməsindən kitabında bəhs edib. Bildirilib ki, Uilyam Harrinin həyat yoldaşı Meqan Marklı “kobud” adlandırıb və bu ailə münaqişəsinə səbəb olub. Bundan başqa, Britaniya şahzadəsi kitabında “Taliban” terror hərəkatının 25 üzvünü qətlə yetirdiyini etiraf edib.

Vurğulanıb ki, bundan əvvəl şahzadə bir neçə dəfə verdiyi müsahibədə ailəsi və Britaniya mediası haqqında sərt danışıb.

“Penguin Random House” bildirib ki, ABŞ-ın keçmiş Prezidenti Barak Obamanın “Vəd edilmiş torpaqlar” əsəriı ABŞ və Kanadada nəşr olunduğu ilk gündə 887 000, xanımı Mişel Obamanın “Gəlirik” (“Becoming") adlı xatirə kitabı isə ABŞ və Kanadada ilk günündə 725 000-dən çox nüsxə satılıb.

Qeyd edək ki, Şahzadə Harri 2006-cı ildə Sandhurst Kral Hərbi Akademiyasını bitirib. 2007-2008 və 2021-2013-cü illərdə Əfqanıstanda “Əl-Qaidə” və “Taliban” yaraqlılarına qarşı döyüş əməliyyatlarında iştirak edib.