Yuxarı

Bakıda V Şairlər Günü qeyd olunur

Builki tədbir mərhum şairə Nurəngiz Günə həsr edilib

Bakı. 5 iyun. REPORT.AZ/ Azərbaycanda V Şairlər Günü başlayıb.  

"Report" xəbər verir ki, Azərbaycan Yazıçılar Birliyinin təşkilatçılığı ilə keçirilən tədbirdə iştirak edən qonaqlar öncə Fəxri xiyabanda ulu öndər Heydər Əliyevin məzarını və Şəhidlər xiyabanını ziyarət ediblər.

Azərbaycanın görkəmli xalq şairləri Səməd Vurğun, Rəsul Rza və Bəxtiyar Vahabzadənin məzarları da ziyarət olunub, qəbirləri üzərinə gül dəstələri qoyulub. 

AYB-nin mətbuat katibi Xəyal Rza "Report"a açıqlamasında Şairlər Gününün əhəmiyyətindən danışıb: "Azərbaycanda şairlərin xüsusi bir günü olmalıydı. Artıq 5-ci ildir ki, unudulmaz şairimiz Mikayıl Müşfiqin doğum günü münasibətilə Şairlər Günü keçirilir. Yaxın və uzaq xaricdəki dostlarımız Bakıya gəliblər. Birlikdə tədbirlər keçiririk, ədəbi əlaqələrimizi inkişaf etdiririk".

Onun sözlərinə görə, bu il baş tutan Şairlər Günü mərhum şairə Nurəngiz Günün xatirəsinə həsr edilib. Bakıya gələn qonaqlar N.Günün məzarını ziyarət edib.

Toplantı AYB-də simpoziumla davam edib. Şairlər Gününün iştirakçıları axşam saat 17.30-da Mikayıl Müşfiqin xatirəsini yad edəcəklər. Belə ki, M.Müşfiqin simvolik məzarı olan Xəzər dənizinə güllər səpiləcək.

Şairlər Gününün yekunu Beynəlxalq Muğam Mərkəzində baş tutacaq. Əvvəlcə Nurəngiz Günün xatirəsinə həsr edilən film göstəriləcək. Sonra isə mərhum şairənin "Qalanlara" adlı şeirlər kitabının təqdimatı olacaq.

V Şairlər Gününün konsert proqramı ilə başa çatacaq.

Qeyd edək ki, Şairlər Günündə Ukraynadan tanınmış radio aparıcısı Konstantin Doroşenko, Gürcüstandan görkəmli yazıçı Givi Alxazişvili, Türkiyədən İLESAM – Türkiye Elm və Ədəbiyat Sahibləri Məslək Birliyinin başqanı Mehmet Nuri Parmaksız, Rusiyadan, AYB Moskva bölməsinin məsul katibi, şair - Afaq Şıxlı, Özbəkistanın “Kitab Dünyası” qəzetinin baş redaktoru, “Şöhrət” ordenli şair Xasiyyət Rüstəm, Tatarıstan Yazıçılar Birliyinin üzvü, şair-publisist Fanil Ganji, tanınmış İran şairi Məhəmməd Rza Cəfəri, Dünya Türk Gənclər Birliyinin başqanı Əkrəm Abdullayev, Türkiyə Cümhuriyyəti, Kocaeli Şairlər və Yazarlar Birliyinin qurucu başqanı Alptəkin Cevhərli, Quzey Kıprıs Türk Cümhuriyyəti, araşdırmaçı-yazar Züleyxa Karaman, Özbəkistan Dövlət Şərq Universitetinin dosenti, Dış Basın Birliyi başqanı Aygül Suyunova, Qırğız Yazıçılar Birliyinin üzvü, şair-publisist Ayjarkın Ergeşova, Makedoniya parlamentinin üzvü, araşdırmaçı-yazar Enes İbrahim və başqaları iştirak edir. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi