"Qarabağ"ın hücumçusu DÇ-2022 üçün ilkin heyətdə yer almayıb

"Qarabağ"ın futbolçusu Kvabena Ovusu bu il Qətərdə keçiriləcək dünya çempionatı üçün Qana millisinin ilkin heyətində yer almayıb.

"Report" Qana Futbol Assosiasiyasının rəsmi saytına istinadən xəbər verir ki, yığmanın baş məşqçisi Otto Addo siyahıya 55 oyunçunun adını daxil edib.

Onlardan 5-i qapıçı, 17-si müdafiəçi, 14-ü yarımmüdafiəçi, 13-ü vinger, 6-sı isə hücumçudur.

Qeyd edək ki, DÇ-2022 noyabrın 20-dən dekabrın 18-dək təşkil olunacaq. Qana yığması H qrupunda Portuqaliya, Uruqvay və Cənubi Koreya ilə üz-üzə gələcək. Kvabena Ovusu 2020-ci ildən "Qarabağ"da çıxış edir.