Lionel Messi mundiallar tarixinin daha bir rekorduna imza atıb

Argentina millisinin futbolçusu Lionel Messi dünya çempionatları tarixinin daha bir rekorduna imza atıb.

“Report”un məlumatına görə, yığmanın kapitanı mundiallarda ən çox məhsuldarlıq göstərən oyunçu ünvanına yiyələnib.

Qətərdə keçirilən DÇ-2022-nin Xorvatiyaya qarşı yarımfinal oyununda 1 dəfə fərqlənib, 1 assistlə yadda qalan kapitan dünya çempionatlarında ümumilikdə 20 qolda yaxından iştirak edib – 11 qol, 9 məhsuldar ötürmə. 35 yaşlı futbolçu bununla Miroslav Kloze (Almaniya – 16 qol + 3 assist), Ronaldo (Braziliya – 15+4), Herd Müller (Almaniya – 14+5) və Pelenin (12+7) şərik olduğu rekordu yeniləyib.

Bundan başqa, Messi 2022-ci ildəki ümumi assist sayını 30-a çatdırıb. Bu, həm də Leonun karyerasında 350-ci məhsuldar ötürmə kimi yadda qalıb.

Qeyd edək ki, Xorvatiya seçməsini 3:0 hesabı ilə məğlub edən Argentina yığması dekabrın 18-də keçiriləcək final matçına vəsiqə qazanıb. Cənubi Amerika təmsilçisinin rəqibi bu gün Fransa ilə Mərakeş arasında baş tutacaq yarımfinal görüşündə müəyyənləşəcək.