Türkiyəli professor: Dünyada yaşıllıqlar azaldığı kimi, mənəvi-əxlaqi dəyərlər də azalır

Dünyada yaşıllıqlar azaldığı kimi, mənəvi-əxlaqi dəyərlər də azalır.

"Report" xəbər verir ki, bunu Türkiyənin “Mərmərə Qrupu” Strateji və Sosial Araşdırmalar Vəqfinin sədri professor Mehmet Akkan Suver Bakıda keçirilən Dini Liderlərin Qlobal Sammitinin ikinci günündə çıxışı zamanı deyib.

O qeyd edib ki, Yer kürəsindəki müharibələrin törətdiyi sosial sıxıntılarla yanaşı, iqlim problemləri də əlavə fəlakətin xəbərçisidir:

"Belə bir anda Bakıda keçiriləcək COP29 bu problemlərin müzakirəsi baxımından çox əhəmiyyətlidir. Azərbaycanın ev sahibliyi etdiyi COP29 tədbirini bəşəriyyətin parlaq gələcəyi adına bir fürsət kimi qiymətləndiririk. Azərbaycanın bu təşəbbüsünün həm də xaos və qarşıdurmalardan, müharibələrdən uzaqlaşmağa şərait yaradacağına inanıram. Bakının dünyaya çağırışı beynəlxalq sülhün təmin edilməsində böyük rol oynayacaq. Dini liderlərin Bakıda görüşü bu təşəbbüsə böyük töhfədir".