​“Hacı Əjdərbəy” məscidi dini icmasının təsisçiləri dəyişdirilib

Bakı. 10 mart. REPORT.AZ/ Bakı şəhərində yerləşən məşhur “Hacı Əjdərbəy” məscidi dini icmasının təsisçiləri dəyişib. “Report”un əldə etdiyi məlumata görə, dini icmanın ümumi yığıncağının qərarı ilə Üzeyir Dadaşov və Bəxtiyar Salmanov dini icmanın təsisçiliyindən çıxıb.

Hazırda dini icmanın təsisçiləri Amid Aslanov, Elşən Rəhimov və Surxay Allahverdiyevdir.

Qeyd edək ki, “Hacı Əjdərbəy” məscidi ötən əsrin əvvəllərində, 1912-1913-cü illərdə tanınmış xeyriyyəçi Əjdər bəy Aşurbəyov tərəfindən Bakı şəhərində tikilərək istifadəyə verilib. Azərbaycanda mötəbər dini ibadət mərkəzlərindən biridir. Bakı müsəlmanlarının ən qədim və iri ibadətgahlarından biri sayılır.

Azərbaycan Prezidenti İlham Əliyev 25 may 2010-cu il tarixdə Bakı şəhərində yerləşən Əjdərbəy məscidinin bərpası ilə əlaqədar tədbirlər haqqında sərəncam imzalayıb. Dövlət vəsaitləri hesabına aparılan və 2007-ci ilin aprel ayından başlayan təmir bərpa işlərinin ümumi sahəsi 4 min kvadratmetr olan məscidin həyətində ibadət üçün xüsusi sahə də ayrılıb.