Yuxarı
    Bağlamaq

    ​QMİ sədri Türkiyənin Azərbaycandakı səfirini qəbul edib

    Dini-mənəvi əlaqələrin inkişaf səviyyəsindən razılıq ifadə olunub

    Bakı. 1 mart. REPORT.AZ/ Bu gün Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Türkiyə Cümhuriyyətinin Azərbaycandakı fövqəladə və səlahiyyətli səfiri İsmayıl Alper Coşqunu qəbul edib.

    Bu barədə "Report"a QMİ-nin mətbuat xidmətindən bildirilib.

    Görüşdə Azərbaycan və Türkiyə arasında bütün sahələrdə olduğu kimi, dini-mənəvi əlaqələrin inkişaf səviyyəsindən razılıq ifadə olunub. Bildirilib ki, "bir millət, iki dövlət" olan Türkiyə və Azərbaycan xalqlarının, dövlətlərinin birliyi, qardaşlığı sarsılmazdır və tarixin sınaqlarından keçib. Bu münasibətlərin təməlində duran dəyişməz dəyərlər var olduqca bu millətlərin qardaşlığı davam və inkişaf edəcək.

    Azərbaycan və Türkiyə xalqlarının rifah və səadəti üçün dualar edən şeyxülislam A.Paşazadə beynəlxalq müstəvidə daima bir-birinə dəstək verən dövlətlərimizə əmniyyət və tərəqqi arzu edib.

    Qafqaz Müsəlmanları İdarəsi ilə Türkiyə Cümhuriyyəti Diyanət İşləri Başkanlığı arasında əlaqələrin olduqca dəyərli, əhəmiyyətli olduğunu vurğulayan QMİ sədri bu əməkdaşlığın bölgəmiz və ümumən, müsəlman birliyi müstəvisində ənənəvi dini-mənəvi dəyərlərimizin qorunması, inkişaf etdirilməsi üçün zəruri olduğuna diqqəti çəkib.

    Səfir İsmayıl Alper Coşqun Azərbaycan və Türkiyə xalqları arasında tarixi dostluq və qardaşlıq, bütün sahələrdə səmərəli əməkdaşlıq əlaqələrinin daha da möhkəmlənməsi üçün əlindən gələni əsirgəməyəcəyini diqqətə çatdırıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi