Zelenski Ukrayna ordusunda islahatlar aparacaq

Ukrayna ordusunda islahatlar həyata keçiriləcək.

"Report"un Şərqi Avropa bürosu xəbər verir ki, bunu Ukrayna Prezidenti Volodimir Zelenski bildirib.

Zelenski İsraildə qəbul edilmiş sistemə əsasən, hərbi xidmətə yanaşmanın dəyişdirilməsini istisna etməyib.

"Bu, Ukrayna Silahlı Qüvvələri və Daxili İşlər Nazirliyinin bazası əsasında hazırladığımız təhlükəsizlik islahatında nəzərdə tutulan modellərdən biridir. Belə bir model var, bu modeli mütləq nəzərdən keçirəcəyik, ictimaiyyətlə müzakirə edəcəyik”, - Ukrayna lideri vurğulayıb.

Zelenski deyib ki, işə qəbul sistemi və hərbi qulluqçuların minimum sayının hesablanması artıq əvvəlki kimi olmayacaq. Tələbələr üçün də yanaşma dəyişəcək.

Ukrayna Prezidenti “İsrail modelinə görə” dəyişikliklərin qadınların hərbi xidmətə cəlb olunmasını nəzərdə tutub-tutmadığına toxunmayıb.