Yunanıstanda narkodiler qruplaşmasının 7 üzvü həbs edilib

Bakı. 9 aprel. REPORT.AZ/ Yunanıstanın Sahil Mühafizəsi Albaniyadan İtaliyaya külli miqdarda narkotik maddə daşıyan beynəlxalq qruplaşmanı müəyyənləşdirdiyini xəbər verib.

"Report"un xarici mətbuaata istinadən verdiyi məlumata görə, qurum narkotik maddələrin daşınması üçün sürətli katerlərdən istifadə edildiyini bildirib.

Sahil Mühafizəsinin Narkotiklərlə Mübarizə bölməsi bununla bağlı keçirilən əməliyyat zamanı 7 nəfəri həbs edib. Onlardan 5-i alban, 2-i yunandır. Cinayətkarlardan 1,5 tondan çox marixuana götürülüb və qruplaşmanın 2 sürətli kateri müsadirə edilib.

Hesablamalara əsasən qruplaşma üzvləri qeyri-leqal yolla milyonlarla avro pul qazanıb.