Nyu-Orleanda insanların üstünə avtomobilin sürülməsi barədə Ağ Ev məlumatlandırılıb

Luiziana ştatının Nyu-Orlean şəhərinin meri Latoya Kantrell bu şəhərdə avtomobilin piyadaların üzərinə sürülməsi ilə bağlı Ağ ev ilə əlaqə saxladığını bildirib.

“Report” xəbər verir ki, o bunu Amerika telekanallarının yayımladığı mətbuat konfransında deyib.

“Mən Ağ ev və [Luiziana] qubernatoru [Ceff] Landri ilə əlaqədəyəm”, – o bildirib.

Mer baş verənləri “terror aktı” adlandırıb, lakin ondan sonra çıxış edən FTB nümayəndəsi Aleta Dankan qeyd edib ki, xüsusi xidmət orqanı hələlik olayı terror aktı kimi təsnif etmir.

Bu arada, KİV Nyu-Orleanda piyadaları vuran şəxsin, ehtimal ki, öldüyünü xəbər verir.