Yaxın Şərqdə hücumlar zamanı yaralanan ABŞ hərbçilərinin sayı 45-ə çatıb

ABŞ-ın Yaxın Şərqdəki bazalarına edilən hücumlarda yaralanan Amerika hərbçilərinin sayı 45 nəfərə çatıb.

“Report” xəbər verir ki, bu barədə mənbələrə istinadən “NBC News” məlumat yayıb.

"Ən azı 45 amerikalı yüngül xəsarətlər və ya beyin xəsarətləri alıb", - nəşr bildirib.

Qeyd olunur ki, 24-ə yaxın hərbi qulluqçu kəllə-beyin travması, daha 21 nəfər isə yüngül xəsarətlər aldıqdan sonra həkim nəzarətindədir.

Bundan əvvəl “İraqın İslam Müqaviməti” təşkilatının “Masrawy” portalı tərəfindən dərc edilən bəyanatına əsasən, şiə yaraqlıları noyabrın 6-da ikisi Suriyada, digər ikisi isə İraqda olmaqla ABŞ-ın dörd bazasına hücum ediblər.