Valensiyada baş vermiş yanğında azı 4 nəfər ölüb - YENİLƏNİB

İspaniyanın Valensiya şəhərində yaşayış binasında baş vermiş yanğın nəticəsində azı dörd nəfər ölüb.

“Report” xəbər verir ki, bu barədə Fövqəladə Vəziyyət üzrə Əlaqələndirmə Mərkəzinin direktor müavini Xorxe Suaresin sosial şəbəkədə yayımlanmış açıqlamasında bildirilib.

“Dörd nəfərin ölümü təsdiqlənib. Binanın xarakteristikası daxilində söndürmə işləri aparmağa imkan vermir. Fasad soyumağa davam edir. Yanğınsöndürənlərin binaya nə vaxt təhlükəsiz şəkildə girə biləcəyi bəlli deyil”, – o deyib.

Eyni zamanda, “El Pais”ə görə, olayda azı 14 nəfər yaralanıb, 19 nəfər isə itkin düşüb. Məlumata görə, yanğın 14-cü mərtəbədə çıxıb. Yanğının bütün binanı əhatə etməsi cəmi yarım saat çəkib.

İspaniyanın Valensiya şəhərinin Kampanar ərazisində 14 mərtəbəli yaşayış binasında baş vermiş yanğın nəticəsində üçü yanğınsöndürən olmaqla 13 nəfər yaralanıb.

“Report” "The Guardian"a istinadən xəbər verir ki, yerli vaxtla 17:30-da (Bakı vaxtı ilə 20:30-da) başlamış yanğında binanın bütün blokları külə dönüb.

Yanğının böyük miqyasından dolayı əraziyə yaxın yaşayış məntəqələrindəki yanğınsöndürənlər də cəlb olunub. Bölgədə səhra xəstəxanası qurulub, əraziyə xeyli sayda təcili tibbi yardım briqadaları cəlb olunub.