Uruqvayın keçmiş prezidenti Xose Muxika vəfat edib

Uruqvayın keçmiş prezidenti, xərçəng xəstəliyindən əziyyət çəkən Xose Muxika 90 yaşında vəfat edib.

“Report”un xəbərinə görə, bu barədə Uruqvay Prezidenti Yamandu Orsi “X” sosial şəbəkəsində məlumat verib.

“Dərin kədər hissi ilə yoldaşımız Pepe Muxikanın vəfatını bildiririk”, - paylaşımda qeyd olunur.

Orsinin sözlərinə görə, Muxika təkcə prezident deyil, həm də fəal, nümunəvi insan və lider olub. "Biz sizin üçün çox darıxacağıq, əziz qoca. Bizə verdiyiniz hər şeyə və xalqımıza göstərdiyiniz böyük məhəbbətə görə təşəkkür edirəm", - o əlavə edib.

Yanvar ayında Muxika ona diaqnozu qoyulan qida borusu xərçəng xəstəliyinin başqa orqanlara keçdiyini və müalicəsinin mümkün olmadığını açıqlayıb və həmyerliləri ilə vidalaşıb.