Ukrayna "Antonov" konsernini payızda ləğv edəcək

Bakı. 26 iyul. REPORT.AZ/ Ukrayna hökuməti "Antonov" konsernini payızda ləğv edəcək.

"Report"un Ukrayna mətbuatına istinadən verdiyi məlumata görə, bu barədə hökumətin qərarında deyilir.

Sənəddə vurğulanır ki, üç aydan sonra Ukraynanın iqtisadi inkişaf və ticarət nazirinin müavini Yuri Brovçenkonun başçılıq etdiyi komissiya konsernin ləğvetmə balansını Nazirlər Kabinetinə təqdim etməlidir.

"Antonov"un ləğv olunması barədə qərar 2016-ci ilin əvvəlində qəbul olunub. Belə ki, konserni təşkil edən üç müəssisə onun tərkibindən çıxaraq "Ukroboronprom" konserninə daxil edilib.

Xatırladaq ki, iqtisadi əməkdaşlıq məsələləri üzrə Azərbaycan-Ukrayna birgə hökumətlərarası komissiyasının 11-ci iclası çərçivəsində Azərbaycanda "An-178" tipli 12-15 təyyarənin tikintisi üzrə istehsalat xəttinin yaradılması haqqında razılaşma əldə olunub.