Tramp İranın nüvə sazişi təklifini qəbul edəcəyinə ümid bəsləyir

ABŞ Prezidenti Donald Tramp ümid edir ki, rəsmi Tehran Vaşinqtonun İranın nüvə proqramı ilə bağlı ABŞ liderinin Yaxın Şərq üzrə xüsusi nümayəndəsi Stiven Uitkoff tərəfindən əvvəllər Tehrana göndərilmiş təklifi qəbul edəcək.

"Report"un xəbərinə görə, bunu Ağ Evin mətbuat katibi Karolin Levitt deyib.

"Xüsusi elçi Uitkoff İran rejiminə çox təfərrüatlı və məqbul təklif göndərdi. Prezident ümid edir ki, onlar bunu qəbul edəcəklər", - o, jurnalistlərə deyib.

Levitt qeyd edib ki, Tehran əks halda ciddi fəsadlarla üzləşəcək.

Çərşənbə axşamı Tramp deyib ki, potensial ABŞ-İran sazişi İslam Respublikası tərəfindən hər hansı formada uranın zənginləşdirilməsini nəzərdə tutmur.