Tramp: ABŞ və Çin bəzi mübahisəli ticarət məsələlərini həll edib

ABŞ və Çin, ilk növbədə, Pekinin nadir torpaq elementlərinin tədarükü ilə bağlı bəzi ticarət məsələlərini həll edib.

“Report” xəbər verir ki, bu barədə ABŞ Prezidenti Donald Tramp Çin Xalq Respublikasının lideri Si Cinpinlə telefon danışığından sonra bildirib.

“Düşünürəm ki, Çin və rəsmi Pekin ilə ticarət sövdələşməsi baxımından çox yaxşı vəziyyətdəyik. Bildiyiniz kimi, bizim Çinlə razılaşmamız (İsveçrədə imzalanmış ticarətlə bağlı – red.) var, lakin biz ilk növbədə nadir torpaq metalları və bəzi digər məsələlərlə bağlı bəzi məsələləri həll etmişik. Bu azaldılmış ticarət tarifləri qüvvədə qalır. Bizim razılaşmamız var”, - amerikalı lider Ağ Evdə Almaniya Kansleri Fridrix Mertslə görüşdən əvvəl jurnalistlərin suallarını cavablandırarkən deyib.