Slovakiya “Leopard 2A8” tanklarının alışını nəzərdən keçirir

Slovakiyanın Müdafiə Nazirliyi Almaniya istehsalı olan “Leopard 2A8” tanklarının alınması variantlarını araşdırır.

“Report” xəbər verir ki, bu barədə TASR informasiya agentliyi ölkənin baş hərbi qurumunun rəhbərliyinə istinadən məlumat yayıb.

“Müdafiə Nazirliyi iqtisadi cəhətdən ən məqsədəuyğun və qənaətli qərarlar qəbul etmək, yeni tankların hazırda qoşunların istifadəsində olan silah sistemləri ilə tam uyğunluğunu təmin edəcək həll yolları üçün bütün mövcud imkanları nəzərdən keçirir”, - agentlik “Leopard 2A8” tanklarının alınması planlarını şərh edən Müdafiə Nazirliyinin mətbuat katibi Tomaş Kostelnikdən sitat gətirib.

Xatırladaq ki, Slovakiyanın müdafiə naziri Robert Kalinyak daha əvvəl ölkəsinin müdafiə ehtiyacları üçün “Leopard 2A8” tankları alan Almaniya tərəfdaşlarına qoşulmaq imkanına malik olduğunu bildirmişdi.

Agentliyin məlumatına görə, Slovakiya ordusunun arsenalında hazırda 30 ədəd “T-72” tankı və 15 ədəd A4 modifikasiyalı “Leopard 2” tankı var.