Şimali Koreya Rusiyaya silah çatdırmadığı və bunu etməyi planlaşdırmadığını bildirib

Koreya Xalq Demokratik Respublikası (KXDR) Rusiya ilə heç vaxt silah sövdələşməsinə getmədiyini və bunu etmək niyyətində olmadığını bildirib.

“Report” xəbər verir ki, bu barədə KXDR-in Mərkəzi Teleqraf Agentliyi bəyanat yayıb.

“Biz bir daha aydın şəkildə bildiririk ki, bizim Rusiya ilə heç vaxt silah razılaşmamız olmayıb və bunu gələcəkdə də etməyi planlaşdırmırıq”, - bəyanatda vurğulanıb.

Həmçinin bildirilib ki, Pxenyan və Moskva arasında bu cür razılaşmalar barədə şayiələr ABŞ-ın Şimali Koreyanın reputasiyasını ləkələmək cəhdidir.

Xatırladaq ki, ötən həftə Ağ evin Milli Təhlükəsizlik Şurasının strateji kommunikasiyalar üzrə koordinatoru Con Kirbi Pxenyanın gizli şəkildə Rusiyanı artilleriya mərmiləri ilə təmin etdiyini deyib.