Səudiyyə Ərəbistanı məhkəməsi 2015-ci ildə Məkkədə tikinti kranının aşmasında ittiham olunan “Bin Laden Group”a bəraət verib.
“Report” xəbər verir ki, bu barədə “əl-Ərəbiyyə” məlumat yayıb.
Məhkəmənin qərarına əsasən, kran əlverişsiz hava şəraiti səbəbindən aşıb və buna görə şirkət heç bir məsuliyyət daşımır.
Qeyd edək ki, 2015-ci il sentyabrın 11-də nəticəsində 107 nəfər dünyasını dəyişib, 238 nəfər yaralanıb. Kranın aşmasına güclü yağış və küləyin səbəb olduğu ehtimal edilirdi.
Məkkədə yerləşən Məscidül-Həramda zəvvarların üzərinə aşan qaldırıcı kran "Saudi Bin Laden Group" inşaat konqlomeratının idarə etdiyi alman şirkətinə məxsusdur.
Üsamə bin Ladenin ailəsinə məxsus olan "Saudi Bin Laden Group" Məscidül-Həramın ərazisinin genişləndirilməsi üzrə 14 milyard dollar dəyərində olan layihəni həyata keçirib.
"Saudi Bin Laden Group" 1931-ci ildə terrorçu Üsamə bin Ladenin atası Məhəmməd bin Laden tərəfindən təsis olunub. Şirkət Səudiyyə Ərəbistanında çoxlu sayda tikinti müqavilələri imzalayıb.