Rusiyanın balıqçı gəmisində zəhərlənmə baş verib: 4 ölü, 4 yaralı

Bakı. 14 mart. REPORT.AZ/ Rusiyanın Nəqliyyatda Təhqiqat Komitəsinin Uzaq Şərq üzrə İstintaq idarəsi Kamçatkada "Zümrüd" balıqçı gəmisində dörd nəfərin ölümü ilə bağlı cinayət işi qaldırıb.

"Report"un məlumatına görə, bu barədə "TASS" agentliyinə Nəqliyyatda Təhqiqat Komitəsinin Uzaq Şərq üzrə İstintaq İdarəsi rəhbərinin böyük köməkçisi Darya Nemçeva bildirib.

"Bu gün səhər dörd nəfər gəmi ilə Petropavlovck-Kamçatsk limanına aparılıb. Daha dörd dənizçi isə xəstəxanaya yerləşdirilib" – deyə o bildirib.

Cinayət Məcəlləsinin bir sıra maddələri üzrə cinayət işi qaldırıldığını deyən D.Nemçeva əlavə edib ki, dənizçilərin ölümünün səbəbini məhkəmə tibbi ekspertizası müəyyən edəcək.

Hüquq-mühafizə orqanlarındakı mənbə isə "Zümrüd" gəmisinin dənizçilərinin ölümünün ilkin səbəbi kimi metil spirtindən zəhərlənməni göstərib. Heyət üzvlərindən bir neçəsi ondan istifadə edib.