Rumıniyada 300 min insan hökumət əleyhinə mitinqə çıxıb

Rumıniyada 300 min insan hökumət əleyhinə mitinqə çıxıb Onlar Cinayət Məcəlləsinə dəyişikliklər və Amnistiya aktı haqqında qərara qarşıdırlar
Digər ölkələr
4 Fevral , 2017 02:57
Rumıniyada 300 min insan hökumət əleyhinə mitinqə çıxıb

Bakı. 4 fevral. REPORT.AZ/ Ölkənin Cinayət Məcəlləsinə dəyişikliklər və Amnistiya aktı haqqında qərarı ilə razı olmayan təqribən 300 min Rumıniya vətəndaşı dördüncü gün ardarda hökumət əleyhinə etiraz mitinqinə toplaşıb.

"Report" xəbər verir ki, bu barədə yerli mətbuat yazıb.

Məlumata görə, paytaxt Buxarestdə daha böyük nümayiş keçirilib. Hökumət evi qarşısına təqribən 150 min insan toplaşıb. Nümayişçilər "Fərmanın ləğvini tələb edirik!", "Hökumət istefa versin!", "Oğrular" və s. kimi şüarlar səsləndiriblər.

Etiraza səbəb yeni hökumətin yanvarın 31-də Amnistiya aktı və cinayət qanunvericiliyinə (Cinayət Məcəlləsi və Cinayət-Posessual Məcəllə) dəyişikliklərə dair iki qanun layihəsini qəbul etməsidir. Onların fikrincə, bu dəyişikliklər nəticəsində rüşvət və korrupsiya maddələrilə tutulan siyasətçilər azadlığa çıxacaq. Çünki Amnistiya aktı 5 ilə qədər azadlıqdan məhrumetmə cəzasına məhkum olunan şəxslərə, hamilə qadınlara, himayəsində azyaşlı uşağı olan qadınlara şamil olunacaq. Bununla yanaşı şərti azadlıqdan məhrum edilmiş şəxslərin üzərindən məhkumluğun da götürülməsi nəzərdə tutulur. Digər qanun layihəsinə əsasən isə dövlət məmuru tərəfindən dövlətə vurulmuş ziyan 42 min avro dəyərindən az olarsa, həmin şəxsə rüşvət vermə və rüşvət alma, eləcə də korrupsiya maddələri üzrə cinayət işi açıla bilməz.

Etiraz aksiyaları Rumıniyanın Kluj, Sibiu, Timişoara, Braşov və digər şəhərlərində də keçirilir.

Artıq Almaniya, ABŞ, Fransa, Kanada, Hollandiya və Belçika hökumətləri Rumıniya əhalisini korrupsiyaya qarşı mübarizəni davam etdirməyə çağırıblar. Eyni zamanda bu ölkələrin Buxarestdə akkreditə olunmuş səfirləri baş nazir Sorin Qrindyanu ilə görüşmək niyyətindədirlər.

Rumıniya prezidenti Klaus Yohannis də baş nazirə məktubla müraciət edərək hökuməti qəbul etdiyi dəyişikliklərin ləğvinə çağırıb.

Son xəbərlər

Orphus sistemi