Pakistan təhlükəsizlik qüvvələri ölkənin şimal-qərbində 27 terrorçunu öldürüb

Pakistan təhlükəsizlik qüvvələri son üç gün ərzində ölkənin şimal-qərbindəki Hayber-Paxtunxva əyalətində 27 yaraqlını öldürüb.

"Report" xəbər verir ki, bu barədə Pakistan Silahlı Qüvvələrinin mətbuat xidməti məlumat yayıb.

Şimali Vəziristan rayonunda qadağan olunmuş Fitnə əl-Xəvaric qruplaşmasına qarşı bir sıra antiterror əməliyyatları həyata keçirilib.

Öldürülən terrorçular hüquq-mühafizə orqanlarının əməkdaşlarına və mülki şəxslərə hücumlarda iştirak ediblər. Onların üzərindən silah və sursat tapılıb.

Vurğulanıb ki, Pakistan təhlükəsizlik qüvvələri 2025-ci ildə 2597 yaraqlını öldürüb. Bu dövrdə Pakistanda 1235 nəfərin ölümünə səbəb olan 5397 terror aktı qeydə alınıb.