Özbəkistan Mərkəzi Bankına yeni rəhbər təyin edilib - YENİLƏNİB

Özbəkistan Ali Məclisinin Senatı namizədliyi ölkə prezidenti tərəfindən təqdim edilmiş Timur İşmetovun Mərkəzi Bankın İdarə Heyətinin sədri təyin edilməsini təsdiqləyib.

Bu barədə “Report” Özbəkistan KİV-lərinə istinadən xəbər verir.

"Mərkəzi Bank haqqında" qanuna əsasən, Özbəkistan Senatı prezidentin təqdimatı əsasında Mərkəzi Bankın İdarə Heyətinin sədrini vəzifəyə təyin və vəzifədən azad edir.

T.İşmetov bu təyinata qədər prezidentin iqtisadi sahələrin inkişafı, investisiya və xarici ticarət siyasətinin həyata keçirilməsi məsələləri üzrə müşavirinin birinci müavini vəzifəsində çalışıb.

KİV-lərin məlumatına görə, 2017-ci ildən Mərkəzi Banka rəhbərlik edən M.Nurmuratov sözügedən bankda sədrin müşaviri vəzifəsini icra edəcək.

Özbəkistan Senatı Prezident Şavkat Mirziyoyevin təqdimatı əsasında Mamarizo Nurmuratovu Mərkəzi Bankının rəhbəri vəzifəsindən azad edib.

Bu barədə “Report” Özbəkistan KİV-lərinə istinadən xəbər verir.

M.Nurmuratov Mərkəzi Banka 2017-2024-cü illərdə rəhbərlik edib. 2000-2004-cü illərdə Özbəkistanın maliyyə naziri olub, 2004-2006-cı illərdə isə Səmərqənd vilayətinə rəhbərlik edib.

Özbəkistan Prezidentinin mətbuat katibi Şerzod Əsədov bildirib ki, Şavkat Mirziyoyev prezidentin iqtisadi sahələrin inkişafı, investisiya və xarici ticarət siyasətinin həyata keçirilməsi üzrə müşavirinin birinci müavini Timur İşmetovun Mərkəzi Bankın İdarə Heyətinin sədri vəzifəsinə namizədliyini Senata təqdim edib.