Mixeil Saakaşvili siyasətə qayıtdığını açıqlayıb: "Ukrayna müharibəsi ilə məşğul olacağam"

Gürcüstanın keçmiş Prezidenti Mixeil Saakaşvili siyasətə qayıtdığını açıqlayıb.

“Report” xəbər verir ki, bunu sabiq dövlət başçısı feybuk səhifəsində yazıb.

O bildirib ki, səhhətindəki problemlərə baxmayaraq, Gürcüstan siyasətində çox fəal olmaq və Ukraynadakı müharibə ilə məşğul olmaq niyyətindədir: “Ukraynanın qələbəsini gözləmək və bunun üçün fəal addımlar atmaq lazımdır”.

Qeyd edək ki, M.Saakaşvili 1967-ci ildə Tbilisidə anadan olub. 2003-cü ildə Gürcüstan Prezidenti Eduard Şevardnadzenin devirilməsi ilə nəticələnən “qızılgül inqilabı”nın əsas ideoloqu və təşkilatçısı olub.

M.Saakaşvili 2004-cü ilin yanvarın 15-də keçirilən seçkilər nəticəsində Gürcüstan Prezidenti seçilib. 2013-cü ildə ikinci prezidentlik müddəti bitib və ölkəni tərk edib.

O, daha sonra Ukraynaya gedib, bu ölkənin vətəndaşlığını qəbul edib və Odessa vilayətinin qubernatoru vəzifəsində çalışıb.

2021-ci ilin oktyabrın 1-də Gürcüstana qayıdıb və həbs olunub.

Sabiq Prezident hazırda Rustavi şəhərində həbsxanada saxlanılır.