Malayziyada qəzaya düşən təyyarə avtomobil və motosikletlə toqquşub, 10 nəfər ölüb

Malayziyada “Beechcraft 390” kiçik həcmli təyyarənin trasa düşərək avtomobil və motosikletlə toqquşması nəticəsində azı 10 nəfər ölüb.

“Report” TASS-a istinadən xəbər verir ki, bu barədə məlumatı yerli polis idarəsi yayıb.

Bildirilib ki, hadisə ölkənin Selanqor əyalətinin qərbində Şah-Aləm şəhərinin ətrafında baş verib.

Məlumata görə, hadisə nəticəsində təyyarənin 2 pilotu, 6 sərnişini, avtomobil və motosiklet sürücüləri ölüb. Toqquşmadan sonra güclü yanğın olub.

Qəza baş verən ərazidə xilasetmə əməliyyatı və polis əməkdaşları işləyir.