Konqoda üsyançı qruplaşma ilə hökumət tərəfdarları arasında qarşıdurma olub, ölənlər var

Konqo Demokratik Respublikasının şərqində mərkəzi hökumət tərəfdarları ilə üsyançı qruplaşmanın üzvləri arasında baş verən atışmada azı 6 nəfər həlak olub.

"Report"un məlumatına görə, bu barədə "Frans Press" agentliyi məlumat yayıb.

Hadisə Şimali Kivu əyalətinin inzibati mərkəzi Qoma şəhərindən 15 km aralıda yerləşən Muqerva kəndində qeydə alınıb.

Yerli hökumət sözçüsü Munguiko Nakozehenin sözlərinə görə, atışma şəhər kafesində hərbçilərlə silahlılar arasında mübahisədən sonra başlayıb. Ölənlər arasında bir əsgər də var.

Ölənlərlə yanaşı, yaralılar da var, onların sayı açıqlanmır.

Hazırda “23 Mart Hərəkatı” üsyançı qruplaşmasının bölmələri Qomaya hücum edir.