Kanadanın qərbində minlərlə insan meşə yanğınları səbəbindən təxliyə edilir

Böyükmiqyaslı meşə yanğınları Kanadanın qərbindəki Alberta və Britaniya Kolumbiyası əyalətlərinin minlərlə sakinini təxliyəyə məcbur edib.

“Report” xəbər verir ki, bu barədə CTV telekanalı məlumat yayıb.

Bildirilib ki, Casper milli təbiət qoruğunun ərazisində yerləşən eyniadlı şəhərin 4,7 min sakinin təxliyəsi barədə göstəriş verilib. Bundan başqa, Britaniya Kolumbiyasında Vilyams gölü bölgəsində yaşayan vətəndaşlara evlərini tərk etmək əmri verilir.

Təxliyənin bir neçə qocalar evinə də toxunacağı dəqiqləşdirilir. Zərərçəkmişlər barədə məlumat verilmir.

Kanadanın qərbində baş verən yanğınlara güclü istilər və ildırım çaxması səbəb olub. Britaniya Kolumbiyası Ətraf Mühit Xidmətinin məlumatına görə, iyulun 21-də təkcə bu bölgədə 20 mindən çox ildırım çaxması qeydə alınıb.