Kaliforniyada zəlzələ olub, ölən və yaralananlar var

Çərşənbə axşamı ABŞ-ın Kaliforniya ştatında baş verən zəlzələ nəticəsində azı 2 nəfər ölüb, daha 11 nəfər yaralanıb.

“Report” xəbər verir ki, bu barədə Humboldt dairəsi şerifinin mətbuat xidməti öz saytında məlumat yayıb.

Hazırda dəymiş ziyan hesablanır. “Poweroutage.us” portalının məlumatına görə, 70 mindən çox ev və müəssisə işıqsız qalıb.

ABŞ-ın Geologiya Xidməti bildirib ki, çərşənbə axşamı Kaliforniyada 6,4 bal gücündə zəlzələ baş verib. Yeraltı təkanların episentri təxminən 12 min nəfər əhalisi olan Fortuna şəhərindən 21,6 km şimal-qərbdə, zəlzələ ocağı 16,1 km dərinlikdə yerləşib.

Xidmətin məlumatına görə, zəlzələ nəticəsində yarana biləcək sunami təhlükəsi yoxdur.