İsrail Ordusu son sutkada Qəzzada 150 hədəfə zərbələr endirib

İsrailin Hərbi Hava Qüvvələri gün ərzində bütün Qəzza zolağına zərbələr endirməyə davam edib.

“Report” xəbər verir ki, bu barədə Ordunun Mətbuat xidməti məlumat yayıb.

Məlumata görə, Fələstin radikallarının hərbi birləşmələri ilə əlaqəli 150-dən çox hədəfə hücum edilib. Vurulan hədəflər arasında minalanmış strukturlar, silah anbarları, tank əleyhinə və snayper atəşi üçün mövqelər, digər hərbi infrastruktur obyektləri, eləcə də ayrı-ayrı silahlı radikallar olub.

Qeyd olunur ki, quru bölmələri gün ərzində anklavın şimalındakı Beyt Hanun şəhəri ərazisində aktiv döyüşlər aparıb, burada radikalları və onların hərbi infrastrukturunu məhv ediblər.

Döyüşlər zolağın cənubundakı Xan Yunis şəhəri yaxınlığında da aparılıb.