İndoneziyada avtobusun qəzaya uğraması nəticəsində azı 10 nəfər ölüb

İndoneziyanın Qərbi Yava əyalətinin Subanq dairəsində avtobusun qəzaya uğraması sonucunda azı 10 nəfər ölüb, ondan çox adam yaralanıb.

“Report” xəbər verir ki, “Xinhua” agentliyi xilasedicilərə istinadən məlumat yayıb.

Bildirilib ki, avtobusda əksəriyyəti tələbələr olmaqla, istirahətdən qayıdan 40-dan çox insan olub.

İlkin versiyaya görə, əyləc sistemi sıradan çıxdıqdan sonra sürücü idarəetməni itirib. Nəqliyyat vasitəsi iki motosikletlə toqquşub və aşıb.

Yaralılar Subanq rayonundakı ixtisaslaşdırılmış xəstəxanalara çatdırılıb.