İtaliyada baş vermiş atışmada 4 nəfər öldürülüb

Bakı. 9 avqust. REPORT.AZ/ İtaliyanın cənubunda, quldurlar arasında baş vermiş atışmada 4 nəfər öldürülüb.

"Report" xəbər verir ki, bu barədə "Reuters" məlumat yayıb.

Məlumatda qeyd olunur ki, hadisə Puliya regionunda, San Marko kəndi yaxınlığında baş verib. Dəmir yolunun yaxınlığında öldürülən şəxslər arasında yerli kriminal qruplaşmalardan birinin rəhbəri Mario Luçionat Romito və onun qaynı Matteo de Palma da var. Onlar avtomobildə öldürülüblər.

Öldürülənlərdən ikisi isə hadisənin şahidi olmuş fermerlərdir. Belə ki, cinayətkarlar kriminal qruplaşma rəhbəri və onun qohumunu öldürdükdən sonra yaxınlıqdakı fermerləri də qətlə yetiriblər.