İspaniya sahillərində 2 min nəfərə yaxın miqrant aşkar edilib

Bakı. 9 oktyabr. REPORT.AZ/ Ötən üç gün ərzində İspaniya sahillərində 1800-dən çox miqrant aşkar edilib.

“Report” RİA "Novosti"yə istinadən xəbər verir ki, bu barədə yerli Dənizdə Xilasetmə Xidməti məlumat yayıb.

Təkcə bazar ertəsi Cəbəllütariq boğazında göyərtələrində 357 nəfərin olduğu 8 qayıq, Alboran dənizində içərilərində 303 nəfərin olduğu 6 qayıq və Kanar arxipelaqının Fuerteventur adası yaxınlığında göyərtəsində 31 nəfər olan bir qayıq aşkar edilib.

Şənbə və bazar günlərində xilasedicilər İspaniya sahillərində – Cəbəllütariq boğazında və Alboran dənizində göyərtələrində 1181 nəfərin olduğu 30 qayıq aşkar ediblər.

Beləliklə, son üç gün ərzində İspaniya sahillərində 1872 nəfər qeyri-leqal miqrant aşkar edilib.