HƏMAS İsrailə əsir Arbel Yehudun qaytarılmasına zəmanət verib

İsrail hakimiyyətinin geri qaytarılmasında israrlı olduğu əsir Arbel Yehud sağdır və Vətəninə qayıdacaq.

“Report” xəbər verir ki, bu barədə HƏMAS-ın teleqram kanalında yayımlanan bəyanatda deyilir.

“İsrail Arbel Yehudun taleyi barədə heç nə bilmədiyi halda, saziş üzrə öhdəliklərini gecikdirir, baxmayaraq ki, HƏMAS onun sağ olduğunu vasitəçilərə çatdırıb və onun azadlığa buraxılacağına dair bütün lazımi zəmanətləri verib”, - məlumatda bildirilir.

Bundan əvvəl İsrailin Baş naziri Benyamin Netanyahunun ofisi bəyan edib ki, A.Yehud qaytarılana qədər icazə saziş icra olunmayacaq. Qeyd edilib ki, Yehud yanvarın 25-də azad edilməli idi.