Əfqanıstanda daha bir sərnişin avtobusu partladılıb, ölənlər və xəsarət alanlar var

Əfqanıstanda son sutkada ikinci partlayış törədilib.

“Report” xəbər verir ki, bu barədə 1TV telekanalı ölkənin Daxili İşlər Nazirliyinə istinadən məlumat yayıb.

Məlumata görə, hadisə Parvan əyalətində, Cabal Sarac rayonunda qeydə alınıb. Belə ki, sərnişin avtobusunun partladılması nəticəsində azı 2 nəfər həlak olub, daha 9 nəfər xəsarət alıb. Yaralıların vəziyyəti barədə məlumat verilmir.

Qeyd edək ki, bu, Əfqanıstanda son sutkada törədilmiş ikinci partlayış hadisəsidir. Daha əvvəl Zabul əyalətinin Şahr-ə-Safa dairəsində sərnişin avtobusunun partladılması nəticəsində azı 16 nəfər həlak olub, daha 41 nəfər xəsarət alıb.