CNN: ABŞ-da dövlət qulluqçularına fəal şəkildə Trampı dəstəkləmək qadağan edilib

Bakı. 6 mart. REPORT.AZ/ ABŞ-da dövlət qulluqçularına hazırkı Prezident Donald Trampın seçkiqabağı kampaniyasının rəmzlərini iş yerində nümayiş etdirmək qadağan olunub.

"Report" CNN telekanalına istinadən xəbər verir ki, buna Trampın faktiki olaraq 2020-ci ildə keçiriləcək prezident seçkilərində namizəd olmaq niyyətini elan etməsi səbəb olub.

"Qadağa geniş xarakter daşıyır və yalnız vizual şeyləri, açıq şəkildə Prezident Donald Trampın yenidən seçilməsinin lehinə və ya əleyhinə istifadə edilən rabitə vasitələrini (elektron poçt və sosial şəbəkələr də daxil olmaqla) əhatə etmir", - telekanal bildirib.

Bu əlavələr Hetç qanununa salınıb. İndi federal orqanların əməkdaşlarına vəzifələrini icra edərkən fəal siyasi fəaliyyətlə məşğul olmaq qadağandır.

Qadağa həmçinin üzərində "Make America Great Again" ("Amerikanı yenidən qüdrətli edək") şüarı olan əşyaların nümayişinə, geyinilməsinə, paylanmasına şamil edilir.