Çilidə daşqınlar səbəbindən fövqəladə vəziyyət elan edilib

Çili hökuməti güclü yağışların səbəb olduğu daşqınlar səbəbindən ölkənin bir neçə bölgəsində fövqəladə vəziyyət elan edib.

"Report" xəbər verir ki, bu barədə Çili Daxili İşlər Nazirliyinin tviter səhifəsində bildirilib.

"Daxili işlər naziri Karolina Toa nəticələrin aradan qaldırılması üçün resursların bölüşdürülməsini daha da sadələşdirmək üçün Valparaiso və Bio-Bio bölgələrini fəlakət zonası elan edib", - hesabatda deyilir.

İndiyədək 3 nəfərin itkin düşdüyü məlum olub. 1000-dən çox insan müvəqqəti sığınacaqlarda yerləşdirilib. 200-dən çox evə ziyan dəyib və ya dağılıb.

Yağışlar bir neçə çayın məcrasından çıxmasına səbəb olub.