Britaniya hökuməti İrana qarşı sanksiyalar siyahısını genişləndirib

Böyük Britaniya hökuməti İrana qarşı sanksiyalar siyahısına daha 8 ad əlavə edib.

"Report" xəbər verir ki, bu barədə Böyük Britaniya Xarici İşlər Nazirliyinin bəyanatında deyilir.

“Qara siyahı”ya İranda üç inqilab məhkəməsinin sədri, İslam İnqilabı Keşikçiləri Korpusunun generalı Məhəmməd Təqi Osanlu, Sistan və Bəlucistan əyalətlərində SEPAH komandirinin iki müavini daxildir. Sistan və Bəlucistan əyalətinin qubernatoru Məhəmməd Kərəmi və Senendej bölgəsinin rəhbəri Həsən Əsgəriyə də sanksiya tətbiq edilib.

Həmin şəxslərə qarşı məhdudiyyətlərin tətbiqi üçün əsas kimi onların yaşamaq, işgəncələrə məruz qalmamaq və ədalətli məhkəmə araşdırması hüququnun ciddi şəkildə pozulmasına dəstək vermələri, təşviq etmələri və ya bu cinayətlərdə iştirak etmələri göstərilir.