Belçikanın baş naziri və müdafiə naziri Ukraynaya gedib

Belçikanın baş naziri Bart de Vever və müdafiə naziri Teo Franken Ukraynaya yollanıblar.

"Report"-un məlumatına görə, bu barədə onlar sosial şəbəkə səhifələrində bildiriblər.

"Biz Ukraynaya doğru yoldayıq", - deyə De Vever öz instaqramında yazıb.

Franken də X sosial şəbəkəsində baş nazirlə birgə foto paylaşaraq, birgə səfəri elan edib. "Baş nazirimizlə birlikdə Ukraynaya doğru hərəkət edirik, avropalıların ən cəsurlarını hər cür dəstəkləyirik", - mesajda bildirilib.

Xatırladaq ki, 2025-ci il fevralın 3-də Belçikada parlament seçkilərindən təxminən səkkiz ay sonra hökumətin yeni tərkibi and içib. Belçikanın yeni baş naziri sağ mərkəzçi "Yeni Flamand Alyansı" siyasi partiyasından olan Bart De Vever olub.