Bayden Ərdoğana F-16 qırıcılarının tədarükünü vəd edib

ABŞ Prezidenti Cozef Bayden və Türkiyə lideri Rəcəb Tayyib Ərdoğan NATO sammitində görüş zamanı Ankaraya F-16 qırıcılarının tədarükü məsələsini müzakirə ediblər.

“Report”un məlumatına görə, bu barədə NTV telekanalı xəbər verib.

Telekanalın Ağ Evdəki mənbələri bildiriblər ki, danışıqlar zamanı Amerika lideri həmkarına sazişin Konqresdən keçməsi üçün müəyyən səylər göstərəcəyinə söz verib.

Söhbət 40 yeni “F-16 Block 70” qırıcısından və Türkiyənin mövcud təyyarələrinin təkmilləşdirilməsi üçün 80-ə yaxın komplektdən gedir. Ağ Evdən verilən rəsmi açıqlamalara görə, Bayden və Ərdoğan Ankaraya F-16-ların tədarükü məsələsini həqiqətən müzakirə ediblər, lakin ABŞ-ın Prezident Administrasiyası Baydenin hər hansı vədi faktını hələ təsdiqləməyib.