Vuçiç Serbiyada qarşıdan gələn seçkilərdə hakim partiyanın qələbə qazanacağına əmindir

Hakim partiya (Serbiya Tərəqqi Partiyası) payızda ölkədə keçiriləcək parlament və prezident seçkilərində qələbə qazanacaq.

"Report"un Balkan bürosu xəbər verir ki, bunu Serbiya Prezidenti Aleksandar Vuçiç Avstriyanın "Die Presse" qəzetinə müsahibəsində deyib.

"İndi deyə bilərəm: üç aydan sonra biz bir çox ölkələrdəkindən qat-qat daha demokratik olacaq seçkilərdə qalib gələcəyik. Biz Serbiyanı iqtisadi cəhətdən daha güclü edəcəyik", - o bildirib.

A.Vuçiç qeyd edib ki, onun prezidentliyi dövründə, son 10 il ərzində Serbiya iqtisadi inkişaf baxımından çox şeyə nail olub.

Son 10 ilin onu dəyişdirib-dəyişdirmədiyi ilə bağlı suala A.Vuçiç belə cavab verib: "Düşünmürəm ki, bir çox Avropa lideri mənim son illərdə yaşadıqlarımı yaşayıblar".