Afrində Racu bələdiyyəsi terrorçulardan təmizlənib, 2434 terrorçu zərərsizləşdirilib

Bakı. 3 mart. REPORT.AZ/ Türkiyə Silahlı Qüvvələri və Azad Suriya Ordusu Afrinin Racu bələdiyyə mərkəzini terrorçulardan təmizləyib. 

“Report” xəbər verir ki, məlumatı Türkiyə Silahlı Qüvvələrinin Baş Qərargahı yayıb. Bildirilib ki, Türkiyə ordusunun Azad Suriya Ordusu ilə birgə Afrində keçirdiyi "Zeytun budağı" adlı antiterror əməliyyatı 42-ci gündür davam edir. Bu müddət ərzində PKK / KCK / PYD-YPG və İŞİD terror qruplaşmalarının 2434 terrorçusu zərərsizləşdirilib, havadan və qurudan endirilən zərbələr nəticəsində terrorçuların yüzlərlə sığınacağı, anbarı və hədəfi məhv edilib.
Əməliyyat nəticəsində 100-dən çox kənd terrorçulardan təmizlənib. 

Qeyd edək ki, “Zeytun budağı” antiterror əməliyyatı 2018-ci il yanvarın 20-də başlayıb.