ABŞ-də baş prokurorlar “TikTok”u uşaqların psixikasına zərər verməkdə ittiham ediblər

ABŞ-nin 13 ştatı və Kolumbiya dairəsinin baş prokurorları “TikTok” sosial şəbəkəsinə qarşı məhkəmə iddiası qaldırıblar. Onlar şirkəti uşaqların psixi sağlamlığına zərər verməkdə və onların şəxsi məlumatlarını toplamaqda ittiham ediblər.

“Report” TASS-a istinadən xəbər verir ki, bu barədə NBC telekanalı məlumat yayıb.

“Gənclər “TikTok” kimi asılılıq yaradan sosial media platformaları səbəbindən psixi problemlərlə üzləşirlər. “TikTok” iddia edir ki, onların platforması gənclər üçün təhlükəsizdir, lakin bu bəyanat həqiqətdən çox uzaqdır”, – NBC Nyu-York ştatının baş prokuroru Letisiya Ceymsin sözlərini sitat gətirib.

Onun mövqeyini Vaşinqton, İllinoys, Kaliforniya, Kentukki, Luiziana, Massaçusets, Missisipi, Nyu-Cersi, Oreqon, Şimali Karolina, Cənubi Karolina ştatları və Kolumbiya dairəsinin baş prokurorları da bölüşürlər.

“TikTok”un nümayəndəsi teleşirkətə bildirib ki, sosial şəbəkə “bu cür bəyanatlarla qətiyyətlə razı deyil” və onları “yanlış və yanıldıcı” hesab edir. “Biz yeniyetmələrin qorunması üçün gördüyümüz işlərlə fəxr edirik və məhsulumuzu yeniləməyə və təkmilləşdirməyə davam edəcəyik”, – o qeyd edib.