Macarıstanda yaşayan azərbaycanlı: "Bu dəfə tamam fərqli Şuşa gördüm"

"Bir il əvvəl də burada olmuşdum, bu dəfə isə tamam fərqli Şuşa gördüm".

Bu fikirləri "Report"a açıqlamasında Diaspor Gənclərinin lll Yay Düşərgəsinin iştirakçısı, Macarıstanda yaşayan azərbaycanlı Nuranə Verdiyeva deyib.

"Şuşada bərpa işləri yüksək sürətlə davam edir. Bir il ərzində gördüklərim belə deməyə əsas verir. Bu, əlbəttə, məni sevindirir. Şuşa tamam başqa şəhərdir. Nağıllardakı şəhərə bənzəyir. Mən indiyədək valideynlərimdən bu ecazkar ərazi haqqında çox eşitmişəm. Artıq ikinci dəfədir Şuşanı canlı görürəm. Həqiqətən, çox sevincliyəm", - o bildirib.

N.Verdiyeva vurğulayıb ki, düşərgədə iştirakdan məmnundur: "Yaşıdlarımla tanış olmaq məni indidən həyəcanlandırır. Əminəm ki, onlarla maraqlı müzakirələrimiz olacaq. Xarici ölkələrdən olan yaşıdlarıma Qarabağın tarixi haqqında danışmağa, onları məlumatlandırmağa çalışacağam".