Gürcüstanın vitse-spikeri Dmanisidə baş verənlərə münasibət bildirib

“Etnik mənsubiyyətindən asılı olmayaraq, vətəndaşlar arasında zorakılıq yolverilməzdir”.

“Report”un yerli bürosu xəbər verir ki, bunu Gürcüstan parlamentinin sədr müavini Arçil Talakvadze deyib.

O bildirib ki, Dmanisidə baş vermiş insidentin milli zəmində qarşıdurma kimi təqdim olunması qəbuledilməzdir: “Bu, opponentlərimizin cəhdləridir və onlar cəmiyyətdə yanlış fikir yaratmaq istəyirlər”.

Vitse-spiker baş verənlərə polisin dərhal reaksiya verdiyini və qanunu pozanların müvafiq qaydada cəzalandırılacağını qeyd edib.

A.Talakvadze deyib ki, etnik azərbaycanlılar əsrlər boyu Gürcüstan cəmiyyətində yaşayıblar: “Azərbaycanlılar bizim vətəndaşlarımızdır. Etnik mənsubiyyətindən asılı olmayaraq, vətəndaşlar arasında istənilən şiddəti qınayıram”.