Məktəbli bazarında vəziyyət - satıcılar alıcı qıtlığı yaşayır - REPORTAJ

Tədris ilinin başlanmasına az müddət qaldığını nəzərə alaraq “Report”un əməkdaşları alıcı sıxlığını müşahidə etmək və məktəb ləvazimatlarının qiymətini öyrənmək üçün mağazalardakı vəziyyətlə maraqlanıb.

Paytaxtdakı mağazalardan birinin satış mütəxəssisi, Elməddin Əliyev ilə söhbət zamanı məlum oldu ki, məktəb ləvazimatlarının qiymətində ötən illə müqayisədə artım var.

Onun sözlərinə görə, məktəbli çantalarının qiymətində keçən illə müqayisədə bu il fərq yoxdur. Qiymətlər təxminən 25-170 manat aralığında dəyişir. Lakin sadə qələmlərin qiyməti 0,7 manatdan 0,9 manata qalxıb. Ən çox artım isə dəftər və qələmlərdə müşahidə olunur. Belə ki, keçən il 24 vərəqli dəftərin qiyməti 0,30 manat idisə, bu il 0,35 manatdır. 40 vərəqli dəftərlərin qiymətində də 0,05 manat artım baş verib. Qələmlərin məbləği 0,9 manatdan 1,5 manata qalxıb. Keçən il 6 manata olan su qabı bu il 7-10 manat arası dəyişir.

Müsahib bildirib ki, ötən illə müqayisədə bu il alıcı sayı çox azdır:

“Hazırda alıcı sıxlığı yoxdur. Ötən il bu vaxtlar biz yetərincə mal satmış olurduq. Bu il isə sezona hələ giriş edə bilməmişik. Ola bilsin bu alıcıların maddi vəziyyəti ilə bağlıdır. Bahalaşma bir-iki məhsul alana təsir etmir. Amma insanlar 50-60 manatlıq alış-veriş edəndə qiymət artımını hiss edirlər”.

Daxil olduğumuz digər mağazada isə vəziyyət fərqlidir. Bəzi məktəb ləvazimatlarının qiyməti ötən illə müqayisədə ucuzlaşıb. Dəftərlərin qiymətində 0,05 manat (0,25-0,20 manat), qələm qablarında 0,50 manat (2,50-2 AZN), bir qutu A4-ün qiymətində isə keçən illə müqayisədə nə az, nə çox, 3 manat (8-5 AZN) ucuzlaşma müşahidə olunur. Çantaların qiyməti isə minimum 10 manatdan başlayır. Digər məhsullarda qiymət aralığı belədir:

Rəngli karandaşlar – 0,80 manat
Pozan – 0,15 manat
Qələm – 0,06 manat
Qələmyonan – 0,40 manat
Rəngli flomaster – 2 manat
Ağardıcı qələmlər – 0,60 - 0,80 manat
Su qabları – 2-10 manat
Termoslar – 4-18 manat
Kağız üçün yapışqan – 0,60-1,5 manat

Hər iki mağazada olan məhsulların Çindən gəlməsinə baxmayaraq niyə bu qədər qiymət fərqi olmasını soruşduqda həmin mağazanın satış mütəxəssisi Əlizadə Xəyal bildirdi ki, düzdür mallar eyni ölkədən gəlir. Lakin azad bazar sistemində qiymət fərqinin olması normal haldır. Çeşid və keyfiyyətə görə də qiymət dəyişə bilər.

O, məktəb dövründə də qiymət artımı gözlənilmədiyini deyib:

“Sizin də gördüyünüz kimi alıcı sayı çox azdır. Ötən illərdə bu vaxt mağazaya insan axını olurdu. Belə halda qiyməti minimumda saxlamalıyıq. Çünki bahalaşma olsa insanlar ümumiyyətlə mağazaya yaxın durmazlar. Sentyabr ayında da hazırkı qiymətlərə artım olacağı nəzərdə tutulmur”.

Aldığımız cavablardan belə nəticəyə gəlmək olar ki, bir məktəbli üçün onun ləvazimatlarına orta hesabla minimum 100 manat məbləğində pul lazımdır. Qeyd edək ki, bu məbləğə məktəbli forması və digər tələbatlar daxil deyil.

FOTO: Vüqar Xanlarov