Yuxarı

​Siyavuş Novruzov: "Bəzi müxalif qüvvələr insanların faciəsinə sevinir, onların xisləti budur"

Təbii ki, kimsə təqsirkardırsa, cəzasını çəkəcək

"Təbii ki, kimsə təqsirkardırsa, cəzasını çəkəcək"

Bakı. 20 may. REPORT.AZ/ "Binəqədidə baş verən hadisə dünyanın hər yerində yaşana bilər. Azərbaycan dövlətinin strukturları buna operativ reaksiya verdilər. Kimlərinsə öz məqsədləri üçün bundan istifadə etməsi azərbaycançılığa zidd hərəkətdir. Belə insanlardan xalq, millət üçün nəsə gözləməyə dəyməz".

Bunu "Report"a açıqlamasında Yeni Azərbaycan Partiyasının (YAP) icra katibinin müavini Siyavuş Novruzov deyib.

O vurğulayıb ki, özgəsinin faciəsindən istifadə edərək hadisəni başqa cür təqdim etmək düzgün deyil: "Bəzi müxalif qüvvələr insanların faciəsinə sevinir. Məsələn, neftin qiyməti düşür, müxalifət sevinir. Belə adamlardan nə desən, gözləmək olar. Bilirsiz ki, neftdən gələn gəlirlər sosial problemlərin həll olunmasına istifadə edilir. Başqa bir faktı deyim: xaricdə Azərbaycanla bağlı mənfi qərar qəbul ediləndə bunlara xoş təsir edir. Onların xisləti budur. Öz maraqlarını xalqın maraqlarından üstün tuturlar. Ona görə müxalifətin sıraları seyrəlir".

S.Novruzov bildirib ki, yanğınla bağlı dövlət bütün addımları atır: "Hadisədən zərərçəkənlərə kompensasiyaların ödənilməsi, mənzillə təmin edilməsi ilə əlaqədar xüsusi komissiya yaradılıb. Təbii ki, kimsə təqsirkardırsa, cəzasını çəkəcək. Bütün hallarda belə məsələlərdə həmrəy olmalıyıq".

Qeyd edək ki, Bakı şəhərinin Binəqədi rayonu, Azadlıq - 200/36 ünvanındakı yaşayış binasında baş vermiş yanğında 15 nəfər dünyasını dəyişib, 50 nəfərə yaxın isə yaralanıb və ya zəhərlənib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi