Prezidentin parlamentdəki çıxışı vacib vəzifələri əhatə edən proqram sənədidir - RƏY

Prezident İlham Əliyevin VII çağırış Milli Məclisin ilk iclasındakı çıxışı yaxın keçmişdə Azərbaycanda və dünyada baş verən proseslərin təhlilinə həsr olunmuş bir hesabat, gələcəkdə yerinə yetirilməsi vacib olan vəzifələri əhatə edən bir proqram sənədidir.

Bu sözləri "Report"a "İslahatçı Gənclər" İctimai Birliyinin sədri, siyasi şərhçi Fərid Şahbazlı deyib.

Onun sözlərinə görə, dövlət başçısı son dörd ildə Azərbaycanın öz ərazi bütövlüyü və suverenliyini tam bərpa etməsini yaxın tariximizin ən mühüm siyasi hadisəsi kimi şərh edib. Bununla yanaşı, illərboyu işğalçı Ermənistana himayədarlıq edən ayrı-ayrı dövlətlərin yenidən fəallaşmasını, onların regionda yeni müharibə ocağı yaratmaq niyyətlərini, anti-Azərbaycan ritorikasını kəskin tənqid edib:

"Prezident açıq formada qeyd etdi ki, bu cür cəhdlər Azərbaycanı haqq yolundan nəinki geri çəkilməyə məcbur edə bilər, əksinə xalqımızı, dövlətimizi və ordumuzu daha ayıq-sayıq və tədbirli olmağa sövq edəcək. Hansı dövlətlərdən Ermənistana nə zaman, necə və hansı silahların daşındığı barədə dəqiq informasiyalara malik olduğunu diqqətə çatdıran dövlət başçısı bu cür təxribatçı hərəkətlərin qarşısının qətiyyətlə alınacağını da vurğulayıb. Bu baxımdan, o, Azərbaycan hərbi-sənaye kompleksinin modernləşdirilməsini, yeni növ silahlar və texnika ilə daha da zənginləşdirilməsini prioritet vəzifə kimi irəli sürüb".

Siyasi şərhçi bildirib ki, Prezident öz çıxışında Azərbaycanın dövlət suverenliyinin tam bərpasının iqtisadi və mədəni inkişaf üçün də geniş perspektivlər açdığını vurğulamaqla ayrı-ayrı dairələr tərəfindən Azərbaycana qarşı aparılan qərəzli kampaniyalar fonunda bu inkişafı dönməz etməyin yollarını da açıqlayıb:

Fərid Şahbazlı

"Onun çıxışında vətəndaşlarımızın azad edilmiş şəhər və kəndlərimizə qayıdışının tam təmin edilməsi, burada dayanıqlı iqtisadi infrastrukturun yaradılması, mədəni-maarif, təhsil və elmi müəssisələr şəbəkəsinin qurulması ilə paralel və kompleks şəkildə aparılması bu prosesin ən vacib komponentləri kimi irəli sürülüb".

F.Şahbazlının sözlərinə görə, Ümummilli Lider Heydər Əliyevin Azərbaycançılıq ideologiyasının milli yüksəlişi təmin edən dəyərlər sistemi kimi Azərbaycan dövlətinin qurulması və inkişafında rolunu qeyd edən Prezident kənar müdaxilələr, ideoloji işğala cəhd, gənclərin zərərli mənəvi-əxlaqi təsirlərdən qorunması məsələlərinə də xüsusi diqqət ayırıb:

"Dövlət başçısı gənclərin düşmən dövlətlərin anti-Azərbaycan təbliğatının təsiri altına düşməməsi, LGBT, "No War" və s. kimi dünyanı ağuşuna alan meyillərin Azərbaycan cəmiyyətinə yol tapmasının qarşısının alınması kimi mühüm mövzuları da ön plana çəkib. Eyni zamanda, noyabr ayında Bakıda keçiriləcək COP29-un Azərbaycan üçün bir böyük sınaq olduğunu deyən dövlət başçısı bu qlobal tədbirin Azərbaycanın beynəlxalq imici baxımından da mühüm bir hadisə olduğunu diqqətə çatdırıb.

Güman edirik ki, ali qanunverici orqan olaraq Milli Məclis Prezidentin bu tarixi çıxışının ruhuna uyğun olaraq fəaliyyət göstərəcək, həm beynəlxalq təşkilatlarda və qurumlarda Azərbaycanın mövqelərini möhkəmləndirəcək, həm də xalqımızın sosial rifah halını, onun elmi-mədəni və mənəvi yüksəlişini təmin edəcək qanun və qərarlar hazırlayacaq".