Yuxarı

​İctimai Komitənin yeni tərkibdə ilk iclası keçirilib

Nazir qurumun üzvlərinə cəzaçəkmə müəssisələrinə maneəsiz buraxılması üçün xüsusi vəsiqələr təqdim edib

Bakı. 7 iyul. REPORT.AZ/ Ölkə Prezidenti İlham Əliyev tərəfindən vətəndaş cəmiyyətinin inkişafına, dövlət idarəetməsində ictimai iştirakçılığın geniş tətbiqinə xüsusi önəm verilir.

Bu məqsədlə 2006-cı ildən ədliyyə naziri yanında tərkibi qeyri-hökumət hüquq müdafiə təşkilatlarının nümayəndələrindən ibarət formalaşdırılan İctimai Komitə uğurla fəaliyyət göstərir. "İctimai iştirakçılıq haqqında" Azərbaycan Respublikası Qanununun qəbul olunması vətəndaş cəmiyyəti institutları ilə əməkdaşlığın daha da genişləndirilməsinə böyük təkan verib, İctimai Komitənin səlahiyyətləri həmin Qanuna uyğun olaraq daha da genişləndirilib, o cümlədən səlahiyyət müddəti artırılıb və Komitə ədliyyənin müxtəlif fəaliyyət istiqamətləri üzrə görülən işlərə fəal cəlb olunur.

Ədliyyə Nazirliyinin mətbuat xidmətindən "Report"a verilən məlumata görə, ötən dövr ərzində Komitə tərəfindən penitensiar müəssisələrə 315-dən artıq başçəkmə həyata keçirilərək məhkumların saxlanma şəraiti və islah prosesinə xüsusi diqqət yetirilib, müvafiq tövsiyələr verilib, 1600-ə yaxın məhkuma müxtəlif məsələlərlə bağlı hüquqi yardım göstərilib.

Həmçinin, ədliyyə fəaliyyətinə dair tədbirlərdə, o cümlədən cəzadan şərti olaraq vaxtından əvvəl azad etmə institutunun tətbiqi ilə bağlı yaradılmış Komissiyanın işində, nazirlikdə fəaliyyət göstərən daimi monitorinq qrupu ilə birgə ədliyyə orqanlarında və məhkəmələrdə keçirilən tədbirlərdə, o cümlədən ictimai rəyin öyrənilməsində, eləcə də kollegiya iclaslarında, konfrans və seminarlarda, "açıq qapı" günlərində, habelə qulluğa qəbulla bağlı müsabiqələrdə (test imtahanı və söhbət mərhələsində) QHT nümayəndələrinin yaxından iştirakı təşviq olunur.

İctimai Komitənin "İctimai iştirakçılıq haqqında" Azərbaycan Respublikası Qanuna uyğun olaraq səlahiyyət müddəti iki ildir və bu müddətin cari ilin iyununda başa çatması ilə əlaqədar nüfuzlu ictimaiyyət nümayəndələrindən, alimlərdən və digər tanınmış şəxslərdən ibarət Seçki Komissiyası ilə Komitə üzvlərinin hesabat görüşü keçirilib, qurumun fəaliyyəti təhlil edilərək qiymətləndirilib. Həmçinin, mətbuatda müsabiqə elan olunaraq müvafiq sahədə ixtisaslaşmış qeyri-hökumət təşkilatları və hüquq müdafiəçiləri Komitənin fəaliyyətində iştiraka dəvət olunub və Komissiya tərəfindən öz proqram və təklifləri ilə müraciət edən namizədlər arasında seçim aparılaraq Komitənin tərkibi yenidən formalaşdırılıb.

İyulun 7-də Komitənin yeni tərkibdə ilk iclası keçirilib, son iki illik fəaliyyəti dövründə görülmüş işlər və qarşıda duran vəzifələr müzakirə olunub, Demokratiya və İnsan Hüquqları Komitəsinin sədri, millət vəkili Çingiz Qənizadə qurumun koordinatoru seçilib.

Tədbirə qatılan ədliyyə naziri Fikrət Məmmədov ölkə başçısı cənab İlham Əliyevin respublikamızda həyata keçirilən proseslərdə, dövlət orqanlarının fəaliyyətində ictimai nəzarətə müstəsna əhəmiyyət verdiyini, ictimaiyyəti daha fəal olmağa çağırdığını vurğulayaraq bildirib ki, ədliyyə sistemində aşkarlığın genişləndirilməsi, ictimai etimadın yüksəldilməsi, qeyri-hökumət təşkilatları ilə qarşılıqlı fəaliyyətin dərinləşdirilməsi daim diqqətdə saxlanılır, bu sahədə ictimai iştirakçılıq geniş tətbiq olunur.

Nazir ədliyyə fəaliyyətində səmərəli ictimai nəzarət mexanizmi kimi İctimai Komitənin mühüm rolunu vurğulayaraq ədliyyənin müxtəlif sahələri üzrə əməkdaşlıq üçün geniş imkanların olduğunu diqqətə çatdırıb, müvafiq tövsiyələr verib.

Komitə üzvləri Ədliyyə Nazirliyinin fəaliyyətində aşkarlığa və şəffaflığa xüsusi önəm verilməsini, ictimaiyyət üçün açıqlığını qeyd edərək bu sahədə vətəndaş məmnunluğuna xidmət edən məqsədyönlü islahatların şahidi olduqlarını qeyd edib, Komitənin ədliyyənin ayrı-ayrı istiqamətləri üzrə fəaliyyətdə iştiraka cəlb olunmalarından məmnunluqlarını ifadə edərək bu sahədə görülən mühüm işlərə töhfə verməyə hazır olduqlarını vurğulayıb, konkret təkliflər irəli sürüblər.

Sonda nazir qurumun üzvlərinə cəzaçəkmə müəssisələrinə maneəsiz buraxılması üçün xüsusi vəsiqələr təqdim edib və uğurlu fəaliyyət arzulayıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi