Göyçayda şəhidlərin xatirəsinə inşa edilən bulaq kompleksinin açılışı olub

Göyçayda Vətən müharibəsi şəhidlərinin adlarının əbədiləşdirilməsi məqsədilə rayonda bulaq kompleksinin açılışı olub.

”Report”un Yuxarı Şirvan bürosu xəbər verir ki, açılış mərasimində şəhid ailələri, rayon ictimaiyyətinin nümayəndələri və Göyçay Rayon İcra hakimiyyəti rəsmiləri iştirak ediblər.

Rayon məscidinin həyətində inşa olunan bulaqda Göyçaydan olan 47 şəhidin şəkilləri həkk olunub.

Tədbirdə çıxış edənlər İkinci Qarabağ müharibəsində canını fəda edən vətən oğullarımızın göstərdiyi qəhrəmanlıqdan danışıblar. Bildirilib ki, bu kimi tədbirlərin keçirilməsi gənclərdə və yeniyetmələrdə vətənpərvərlik hissinin oyanmasına səbəb olur.

Qeyd edək ki, bulaq kompleksi rayon dindarlarının təşəbbüsü ilə inşa olunub.