Yuxarı

Daxili İşlər Nazirliyi həkim vəzifələri üzrə müsabiqə elan edir

Müsabiqədə iştirak etmək üçün sənədlər oktyabrın 28-dək hər gün Daxili İşlər Nazirliyinin Baş Kadrlar İdarəsində qəbul edilir

Bakı. 26 sentyabr. REPORT.AZ/ Daxili İşlər Nazirliyi Tibb İdarəsinin müalicə-profilaktika müəssisələrində vakant olan - 3 həkim-cərrah, 3 həkim-travmatoloq, 1 həkim-neyrocərrah, 1 ordinator-rentgenoloq, 1 ordinator-otolorinqoloq, 2 psixoloq ümumilikdə 11 vəzifə üzrə xidmətə qəbulla bağlı müsabiqə elan edir. Bu barədə "Report"a nazirlikdən məlumat verilib.

Müsabiqədə dövlət ali təhsil müəssisələrində müvafiq ixtisasla təhsil alaraq magistr (psixoloqlar üçün) pilləsini bitirən, tibb və təhsil müəssisələrində rezidentura keçmiş, ixtisas üzrə azı 5 il praktiki təcrübəyə malik, yaşı 35-dən yuxarı olmayan, "Azərbaycan Respublikasının daxili işlər orqanlarında xidmət keçmə haqqında Əsasnamə"də müəyyən olunmuş şərtlərə cavab verən Azərbaycan vətəndaşları iştirak edə bilərlər.

Müsabiqə qaliblərinə DİN-in kadrları tərkibinə daxil edilərək müvafiq xüsusi rütbə verilməklə ilkin olaraq 500 manat aylıq təminat xərcliyi, eləcə də göstərdiyi pullu xidmətə görə əlavə pul vəsaiti ödəniləcək, habelə qanunvericiliklə müəyyən olunmuş qaydada onların daxili işlər orqanları əməkdaşlarına şamil olunan bütün imtiyazlardan istifadə hüququ olacaqdır.

Müsabiqədə iştirak etmək istəyən şəxslər Baş Kadrlar İdarəsinə müraciət edərək şəxsiyyət vəsiqəsini, ali təhsil haqqında diplom və əmək kitabçasının surətini şəxsən təqdim etməlidirlər.

Müsabiqədə iştirak etmək üçün sənədlər sentyabrın 28-dən oktyabrın 28-dək hər gün (istirahət günlərindən başqa) saat 10-dan 17-dək Bakı şəhəri, Azərbaycan prospekti 5, Daxili İşlər Nazirliyinin Baş Kadrlar İdarəsində qəbul edilir.

Əlavə məlumat almaq istəyənlər (012) 590-92-70 və (012) 590-80-94 nömrəli telefonlarla Daxili İşlər Nazirliyinin Baş Kadrlar İdarəsi ilə əlaqə saxlaya bilərlər.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi